قصيدة كتبتها عجوز بعد ان اودعها ابنها في دار المسنين

ويـن انـت يـا حمـدان امـك تنـاديـك .. وراك مــا تسـمـع شكـايـا ونـدايـا
يا مسندي قلبي على الدوم يطريك .. ما غبت عن عيني وطيفـك سمايـا
هـذي ثـلاث سنيـن والعيـن تبكيـك .. مـا شفـت زولـك زايـر يـا ضنايـا
تذكـر حياتـي يـوم اشيلـك واداريـك . . والاعبـك دايــم وتمـشـي ورايــا
ترقد على صوتي وحضني يدفيك .. ما غيـرك احـدٍ ساكـن فـي حشايـا
واليا مرضت اسهر بقربك واداريك .. ما ذوق طعم النوم صبح ومسايا
يامـا عطيتـك مـن حنانـي وبعطيـك .. تكـبـر وتكـبـر بـالأمـل يــا منـايـا
لكن خساره بعتني اليـوم وشفيـك .. واخلصـت للزوجـه وانـا لـي شقايـا
انـا ادري انهـا قاسيـه مـا تخلـيـك .. قـالـت عـجـوزك مــا ابيـهـا معـايـا
خليتني وسط المصحه وانا ارجيك .. هـذا جـزا المعـروف وهـذا جزايـا
يـا ليتنـي خدامـة بيـن اياديـك . مـن شــان اشـوفـك كــل يــوم برضـايـا
مشكـور يـا ولـدي وتشكـر مساعيـك .. وادعــي لــك الله دايــم بالهـدايـا
حمدان يا حمـدان امـك توصيـك .. اخـاف مـن تلحـق تشـوف الوصايـا
اوصيـت دكتـور المصحـه بيعطيـك .. رسالتـي واحروفـهـا مــن بكـايـا
وان مت لا تبخـل علـي بدعاويـك .. واطلـب لـي الغفـران وهـذا رجايـا
وامطـر تـراب القبـر بدمـوع عينيـك .. مـا عـاد ينفـعـك الـنـدم والنعـايـا

شكرا عالقصيده الحلوة

الله لا يحرمنا منك ولا من جديدك من المواضيع الحلوة

ارجو تقبلي مروري

سلام